Ég heiti Helga Björk Haraldsdóttir og er sálfræðingur og stofnandi Verkjalaus. Sjálf barðist ég við verkjasjúkdóma í þrjátíu ár þar til ég kynntist þeim flokki meðferða sem Verkjaendurferlun (PRT) tilheyrir. Þessar meðferðir byggja á breyttri hugmyndafræði í verkjafræðum og nýjustu þekkingu í taugavísindum. Það er skemmst frá því að segja að þær hafa gjörbreytt lífi mínu og fjölda annarra og ég er mjög þakklát að vinna við að rétta fólki verkfæri til að bæta líf sitt og losna undan áþján þrálátra líkamlegra einkenna.

​

Í júlí árið 2025 barst mér öflugur liðsauki þegar Freyja Barkardóttir sjúkraþjálfari ákvað að ganga til liðs við Verkjalaus eftir mjög gott samstarf okkar á endurhæfingarstöðinni þar sem við unnum áður saman í þverfaglegri vinnu. Við sjáum hvað það er oft árangursríkt að styðja við fólk á þverfaglegan hátt og í samstarfinu finnst okkur oft eins og 1+1 verði ekki tveir heldur að minnsta kosti fjórir sem getur breytt svo miklu fyrir okkar skjólstæðinga. Ég hvet gjarnan þá skjólstæðinga mína sem einnig eru í sjúkraþjálfun til að færa sig til Freyju á meðan á okkar meðferðarvinnu stendur. 

​

Við hjá Verkjalaus leggjum áherslu á að það erum ekki við sem breytum lífi þínu, það ert þú sem gerir það og það er svo valdeflandi og í raun stórkostlegt ferðalag. Talið er að að minnsta kosti 1,5 milljarður manna þjáist af krónískum verkjum og oft á tíðum er leiðin til bata möguleg og meira að segja nokkuð greiðfær. Meðferðarleiðirnar sem um ræðir hafa verið að skila miklum árangri hjá verkjasjúklingum og oft á stuttum tíma.

 

Ef þú þjáist af langvinnum verkjum þá hvetjum við þig til að hlusta á Verkjacastið (fimm stuttir hljóðvarpsþættir) og kíkja á bloggið okkar. Svo ertu velkomin til okkar ef þú vilt stuðning á þinni leið til bata.